8. Manasikāralakkhaṇapañho
8. Rājā
V0.30 āha ‘‘ kiṃlakkhaṇo , bhante nāgasena , manasikāro , kiṃlakkhaṇā paññā ’’ ti ?‘‘ Ūhanalakkhaṇo kho , mahārāja , manasikāro , chedanalakkhaṇā paññā ’’ ti .
‘‘ Kathaṃ ūhanalakkhaṇo manasikāro , kathaṃ chedanalakkhaṇā paññā , opammaṃ karohī ’’ ti .
‘‘ Jānāsi , tvaṃ mahārāja , yavalāvake ’’ ti .
‘‘ Āma
P0.33 , bhante , jānāmī ’’ tiM0.32 .‘‘ Kathaṃ , mahārāja , yavalāvakā yavaṃ lunantī ’’ ti ?
‘‘ Vāmena , bhante , hatthena yavakalāpaṃ gahetvā dakkhiṇena hatthena dāttaṃ gahetvā dāttena chindantī ’’ ti .
‘‘ Yathā , mahārāja , yavalāvako vāmena hatthena yavakalāpaṃ gahetvā dakkhiṇena hatthena dāttaṃ gahetvā yavaṃ chindati , evameva kho , mahārāja , yogāvacaro manasikārena mānasaṃ gahetvā paññāya kilese chindati , evaṃ kho , mahārāja , ūhanalakkhaṇo manasikāro , evaṃ chedanalakkhaṇā paññā ’’ ti .
‘‘ Kallosi , bhante nāgasenā ’’ ti .
Manasikāralakkhaṇapañho aṭṭhamo .