Ādesanāpāṭihāriyavaṇṇanā
485. Kāmaṃ ‘‘ cetasikan ’’ ti padaṃ ye cetasi niyuttā cittena sampayuttā , tesaṃ sādhāraṇavacanaṃ , sādhāraṇe pana gahite cittaviseso gahitova hoti , sāmaññajotanā ca visese avatiṭṭhatīti cetasikaggahaṇassa adhippāyaṃ vivaranto ‘‘ somanassadomanassaṃ adhippetan ’’ ti āha .
Somanassaggahaṇena cettha tadekaṭṭhā rāgādayo , saddhādayo ca dassitā honti , domanassaggahaṇena dosādayo .
Vitakkavicārā pana sarūpeneva dassitā .
Evaṃ tava manoti iminā ākārena tava mano pavattoti attho
P1.508 .Kena pakārena pavattoti āha ‘‘ somanassito vā ’’ tiādi .
‘‘ Evaṃ tava mano ’’ ti idaṃ pana somanassitatādimattadassanaṃ , na pana yena yena somanassito vā domanassito vā , taṃ taṃ dassanaṃ .
Dutiyan ti ‘‘ itthampi te mano ’’ ti idaṃ .
Itipīti ettha iti -saddo nidassanattho ‘‘ atthīti kho , kaccāna , ayameko anto ’’ tiādīsu ( saṃ . ni .2.15;3.90) viya , tenāha ‘‘ imañca imañca atthaṃ cintayamānan ’’ ti pi -saddo vuttatthasampiṇḍanattho .
Parassa cintaṃ manati jānāti etenāti cintāmaṇi .
Tassā kira vijjāya sādhako puggalo tādise desakāle mantaṃ parijappitvā yassa cittaṃ jānitukāmo , tassa diṭṭhasutādivisesasañjānanamukhena cittācāraṃ
M1.390 anuminanto kathetīti keci .Apare ‘‘ vācaṃ niccharāpetvā tattha akkharasallakkhaṇavasenā ’’ ti vadanti .