197.

‘‘ Ambapallavasaṅkāsaṃ , aṃse katvāna cīvaraṃ ;

Nisinno hatthigīvāyaṃ , gāmaṃ piṇḍāya pāvisiṃ .

198.

‘‘ Hatthikkhandhato oruyha , saṃvegaṃ alabhiṃ tadā ; – gāthādvayamāha ;

Sohaṃ ditto tadā santo , patto me āsavakkhayo ’’ ti . Tattha ambapallavasaṅkāsaṃ , aṃse katvāna cīvaran ti ambapallavākāraṃ pavāḷavaṇṇaṃ cīvaraṃ khandhe karitvā uttarāsaṅgaṃ karitvā . Gāman ti attano rājadhāniṃ hatthikkhandhe nisinno piṇḍāya pāvisiṃ , paviṭṭhamattova mahājanena olokiyamāno hatthikkhandhato oruyha ṭhito paṭibujjhiṃ , pabuddhova saṃvegaṃ alabhiṃ tadā ‘‘ muṭṭhassati asampajāno hutvā niddāyokkamanena etaṃ jātan ’’ ti . Apare pana ‘‘ rājāva hutvā rattibhāge evarūpaṃ supinaṃ disvā vibhātāya rattiyā hatthikkhandhaṃ āruyha nagaravīthiyaṃ caranto taṃ supinaṃ saritvā hatthikkhandhato oruyha saṃvegaṃ labhitvā satthu santike pabbajitvā arahattaṃ patvā udānaṃ udānento imā gāthā abhāsī ’’ ti vadanti . Dittoti tasmiṃ rājakāle jātimadabhogamadādiparidappito samāno saṃvegamalabhinti yojanā .

Usabhattheragāthāvaṇṇanā niṭṭhitā .