316. ‘‘ Yañhi eke jigucchanti , mataṃ disvāna pāpakaṃ ; Kāmarāgo pāturahu , andhova savatī ahuṃ .

317. ‘‘ Oraṃ odanapākamhā , tamhā ṭhānā apakkamiṃ ; Satimā sampajānohaṃ , ekamantaṃ upāvisiṃ .

318.

‘‘ Tato me manasīkāro , yoniso udapajjatha ;

Ādīnavo pāturahu , nibbidā samatiṭṭhatha .

321. ‘‘ Abbūḷhaṃ aghagataṃ vijitaṃ , ekañce ossajeyya kalīva siyā ; Sabbānipi ce ossajeyya andhova siyā , samavisamassa adassanato .

322. ‘‘ Yañhi kayirā tañhi vade , yaṃ na kayirā na taṃ vade ; Akarontaṃ bhāsamānaṃ , parijānanti paṇḍitā .

323. ‘‘ Yathāpi ruciraṃ pupphaṃ , vaṇṇavantaṃ agandhakaṃ ; Evaṃ subhāsitā vācā , aphalā hoti akubbato .

325. ‘‘ Vassati devo yathāsugītaṃ , channā me kuṭikā sukhā nivātā ; Tassaṃ viharāmi vūpasanto , atha ce patthayasī pavassa deva .

326.

‘‘ Vassati devo yathāsugītaṃ , channā me kuṭikā sukhā nivātā ;

Tassaṃ viharāmi santacitto , atha ce patthayasī pavassa deva .

327. ‘‘ Vassati devo … pe … tassaṃ viharāmi vītarāgo … pe ….

330.

‘‘ Yaṃ patthayāno dhammesu , upajjhāyo anuggahi ;

Amataṃ abhikaṅkhantaṃ , kataṃ kattabbakaṃ mayā .

331.

‘‘ Anuppatto sacchikato , sayaṃ dhammo anītiho ;

Visuddhañāṇo nikkaṅkho , byākaromi tavantike .

333. ‘‘ AppamattassaM2.49 me sikkhā , sussutā tava sāsane ; Sabbe me āsavā khīṇā , natthi dāni punabbhavo .

335.

‘‘ SādhūV2.44 hi kira me mātā , patodaṃ upadaṃsayi ;

Yassāhaṃ vacanaṃ sutvā , anusiṭṭho janettiyā ;

Āraddhavīriyo pahitatto , patto sambodhimuttamaṃ .

337. ‘‘ Ajjhattañca bahiddhā ca , ye me vijjiṃsu āsavā ; Sabbe asesā ucchinnā , na ca uppajjare puna .

338.

‘‘ Visāradā kho bhaginī , evamatthaṃ abhāsayi ;

Apihā nūna mayipi , vanatho te na vijjati .

340. ‘‘ AtthāyaM2.53 vata me buddho , nadiṃ nerañjaraṃ agā ; Yassāhaṃ dhammaṃ sutvāna , micchādiṭṭhiṃ vivajjayiṃ .

341.

‘‘ Yajiṃ uccāvace yaññe , aggihuttaṃ juhiṃ ahaṃ ;

Esā suddhīti maññanto , andhabhūto puthujjano .

342.

‘‘ Diṭṭhigahanapakkhando , parāmāsena mohito ;

Asuddhiṃ maññisaṃ suddhiṃ , andhabhūto aviddasu .

343. ‘‘ Micchādiṭṭhi pahīnā me , bhavā sabbe vidālitā ; Juhāmi dakkhiṇeyyaggiṃ , namassāmi tathāgataṃ .

345. ‘‘ Pāto majjhanhikaṃ sāyaṃ , tikkhattuṃ divasassahaṃ ; Otariṃ udakaṃ sohaṃ , gayāya gayaphagguyā .

346. ‘‘ YaṃV2.49 mayā pakataṃ pāpaṃ , pubbe aññāsu jātisu ; Taṃ dānīdha pavāhemi , evaṃdiṭṭhi pure ahuṃ .

347. ‘‘ SutvāM2.56 subhāsitaṃ vācaṃ , dhammatthasahitaṃ padaṃ ; Tathaṃ yāthāvakaṃ atthaṃ , yoniso paccavekkhisaṃ .

348.

‘‘ Ninhātasabbapāpomhi , nimmalo payato suci ;

Suddho suddhassa dāyādo , putto buddhassa oraso .

350. ‘‘ Vātarogābhinīto tvaṃ , viharaṃ kānane vane ; Paviddhagocare lūkhe , kathaṃ bhikkhu karissasī ’’ ti . – Āha . Taṃ sutvā thero –

351.

‘‘ PītisukhenaV2.52 vipulena , pharamāno samussayaṃ ;

Lūkhampi abhisambhonto , viharissāmi kānane .

352. ‘‘ Bhāvento satipaṭṭhāne , indriyāni balāni ca ; Bojjhaṅgāni ca bhāvento , viharissāmi kānane .

355. ‘‘ Olaggessāmi te citta , āṇidvāreva hatthinaṃ ; Na taṃ pāpe niyojessaṃ , kāmajālaṃ sarīrajaṃ .

357. ‘‘ Yathā kuñjaraṃ adantaṃ , navaggahamaṅkusaggaho ; Balavā āvatteti akāmaṃ , evaṃ āvattayissaṃ taṃ .

358.

‘‘ Yathā varahayadamakusalo , sārathipavaro dameti ājaññaṃ ;

Evaṃ damayissaṃ taṃ , patiṭṭhito pañcasu balesu .

360.

‘‘ UpārambhacittoM2.68 dummedho , suṇāti jinasāsanaṃ ;

Ārakā hoti saddhammā , nabhaso pathavī yathā .

361. ‘‘ Upārambhacitto dummedho , suṇāti jinasāsanaṃ ; Parihāyati saddhammā , kāḷapakkheva candimā .

362. ‘‘ Upārambhacitto dummedho , suṇāti jinasāsanaṃ ; Parisussati saddhamme , maccho appodake yathā .

363. ‘‘ Upārambhacitto dummedho , suṇāti jinasāsanaṃ ; Na virūhati saddhamme , khette bījaṃva pūtikaṃ .

365.

‘‘ Upasampadā ca me laddhā , vimutto camhi anāsavo ;

So ca me bhagavā diṭṭho , vihāre ca sahāvasiṃ .

368. ‘‘ Tato kalyāṇavākkaraṇo , sammāsambuddhasāvako ; Soṇo abhāsi saddhammaṃ , buddhaseṭṭhassa sammukhā .

370. ‘‘ Yo ve garūnaṃ vacanaññu dhīro , vase ca tamhi janayetha pemaṃ ; So bhattimā nāma ca hoti paṇḍito , ñatvā ca dhammesu visesi assa .

371. ‘‘ Yaṃ āpadā uppatitā uḷārā , nakkhambhayante paṭisaṅkhayantaṃ ; So thāmavā nāma ca hoti paṇḍito , ñatvā ca dhammesu visesi assa .

372. ‘‘ Yo ve samuddova ṭhito anejo , gambhīrapañño nipuṇatthadassī ; Asaṃhāriyo nāma ca hoti paṇḍito , ñatvā ca dhammesu visesi assa .

373. ‘‘ Bahussuto dhammadharo ca hoti , dhammassa hoti anudhammacārī ; So tādiso nāma ca hoti paṇḍito , ñatvā ca dhammesu visesi assa .