98. ‘‘ Rūpaṃ disvā sati muṭṭhā , piyaṃ nimittaṃ manasikaroto ; Sārattacitto vedeti , tañca ajjhosa tiṭṭhati ; Tassa vaḍḍhanti āsavā , bhavamūlopagāmino ’’ ti . – gāthaṃ abhāsi ;

Tattha rūpan ti rajjanīyaṃ rūpāyatanaṃ , taṃ panettha itthirūpaṃ adhippetaṃ . Disvāti cakkhunā disvā , cakkhudvārānusārena nimittānubyañjanasallakkhaṇavasena taṃ gahetvā , tassa tathāgahaṇahetūti attho . Sati muṭṭhāti asubhasabhāve kāye ‘‘ asubhan ’’ tveva pavattanasati naṭṭhā . Yathā pana rūpaṃ disvā sati naṭṭhā , taṃ dassento āha ‘‘ piyaṃ nimittaṃ manasikaroto ’’ ti . Yathāupaṭṭhitaṃ ārammaṇaṃ ‘‘ subhaṃ sukhan ’’ tiādinā piyanimittaṃ katvāM1.256 ayonisomanasikārena manasikaroto sati muṭṭhāti yojanā .

Tathā bhūtova sārattacitto vedetīti suṭṭhu rattacitto hutvā taṃ rūpārammaṇaṃ anubhavati abhinandati , abhinandanto pana tañca ajjhosa tiṭṭhati ajjhosāya taṃ ārammaṇaṃ gilitvā pariniṭṭhapetvā vattati ceva , evaṃbhūtassa ca tassa vaḍḍhanti āsavā bhavamūlopagāminoti bhavassa saṃsārassa mūlabhāvaṃ kāraṇabhāvaṃ upagamanasabhāvā kāmāsavādayo cattāropi āsavā tassa puggalassa uparūpari vaḍḍhantiyeva , na hāyanti .

Mayhaṃ pana paṭisaṅkhāne ṭhatvā vipassanaṃ vaḍḍhetvā saccāni paṭivijjhantassa maggapaṭipāṭiyā te cattāropi āsavā anavasesato pahīnā parikkhīṇāti adhippāyo .

Abhayattheragāthāvaṇṇanā niṭṭhitā .