3. Channattheravatthu
Na
M1.350 bhaje pāpake mitteti imaṃ dhammadesanaṃ satthā jetavane viharanto channattheraṃ ārabbha kathesi .So
V1.312 kira āyasmā ‘‘ ahaṃ amhākaṃ ayyaputtena saddhiṃ mahābhinikkhamanaṃP2.111 nikkhanto tadā aññaṃ ekampi na passāmi , idāni pana ‘ ahaṃ sāriputto nāma , ahaṃ moggallāno nāma , mayaṃ aggasāvakamhā ’ ti vatvā ime vicarantī ’’ ti dve aggasāvake akkosati .Satthā bhikkhūnaṃ santikā taṃ pavattiṃ sutvā channattheraṃ pakkosāpetvā ovadati .
So taṅkhaṇeyeva tuṇhī hutvā puna gantvā there akkosatiyeva .
Evaṃ yāvatatiyaṃ akkosantaṃ pakkosāpetvā satthā ovaditvā ‘‘ channa , dve aggasāvakā nāma tuyhaṃ kalyāṇamittā uttamapurisā , evarūpe kalyāṇamitte sevassu bhajassū ’’ ti vatvā dhammaṃ desento imaṃ gāthamāha –
78.
‘‘ Na bhaje pāpake mitte , na bhaje purisādhame ;
Bhajetha mitte kalyāṇe , bhajetha purisuttame ’’ ti .
Tassattho – kāyaduccaritādiakusalakammābhiratā pāpamittā nāma .
Sandhicchedanādike vā ekavīsatianesanādibhede vā aṭṭhāne niyojakā purisādhamā nāma .
Ubhopi vā ete pāpamittā ceva purisādhamā ca , te na bhajeyya na payirupāseyya , viparītā pana kalyāṇamittā ceva sappurisā ca , te bhajetha payirupāsethāti .
Desanāvasāne bahū sotāpattiphalādīni pāpuṇiṃsūti .
Channatthero pana taṃ ovādaṃ sutvāpi purimanayeneva bhikkhū akkosati paribhāsati .
Punapi satthu ārocesuṃ
P2.112 .Satthā ,‘‘ bhikkhave , mayi dharante channaṃ sikkhāpetuṃ na sakkhissatha , mayi pana parinibbute sakkhissathā ’’ ti vatvā parinibbānakāle āyasmatā ānandena ,‘‘ bhante , kathaṃ channatthere amhehi paṭipajjitabban ’’ ti vutte ,‘‘ ānanda , channassa bhikkhuno brahmadaṇḍo dātabbo ’’ ti āṇāpesi .
So satthari parinibbute ānandattherena ārocitaṃ brahmadaṇḍaṃ sutvā dukkhī dummano tikkhattuṃ mucchito patitvā ‘‘ mā
M1.351 maṃ , bhante , nāsayitthā ’’ ti yācitvā sammā vattaṃ pūrento na cirasseva saha paṭisambhidāhi arahattaṃ pāpuṇīti .Channattheravatthu tatiyaṃ .