4. Aññatarabrāhmaṇavatthu
Jhāyin ti imaṃ dhammadesanaṃ satthā jetavane viharanto aññataraṃ brāhmaṇaṃ ārabbha kathesi .
So kira cintesi –
‘‘ satthā attano sāvake ,‘ brāhmaṇā ’ ti
P4.142 vadati , ahañcamhi jātigottena brāhmaṇo , mampi nu kho evaṃ vattuṃ vaṭṭatī ’’ ti .So satthāraṃ upasaṅkamitvā tamatthaṃ pucchi .
Satthā ‘‘ nāhaṃ jātigottamattena brāhmaṇaṃ vadāmi , uttamatthaṃ arahattaṃ anuppattameva panevaṃ vadāmī ’’ ti vatvā imaṃ gāthamāha –
386.
‘‘ Jhāyiṃ virajamāsīnaṃ , katakiccamanāsavaṃ ;
Uttamatthamanuppattaṃ , tamahaṃ brūmi brāhmaṇan ’’ ti .
Tattha jhāyin ti duvidhena jhānena jhāyantaṃ kāmarajena virajaṃ vane ekaka māsīnaṃ catūhi maggehi soḷasannaṃ kiccānaṃ katattā katakiccaṃ āsavānaṃ abhāvena anāsavaṃ uttamatthaṃ arahattaṃ anuppattaṃ ahaṃ brāhmaṇaṃ vadāmīti attho .
Desanāvasāne
V2.365 so brāhmaṇo sotāpattiphale patiṭṭhahi , sampattānampi sātthikā dhammadesanā ahosīti .Aññatarabrāhmaṇavatthu catutthaṃ .