24. Mahāpanthakattheravatthu
Yassa
M2.419 rāgo cāti imaṃ dhammadesanaṃ satthā veḷuvane viharanto mahāpanthakaṃ ārabbha kathesi .So hāyasmā cūḷapanthakaṃ catūhi māsehi ekaṃ gāthaṃ paguṇaṃ kātuṃ asakkontaṃ ‘‘ tvaṃ sāsane abhabbo , gihibhogāpi parihīno , kiṃ te idha vāsena , ito nikkhamā ’’ ti vihārā nikkaḍḍhitvā dvāraṃ thakesi .
Bhikkhū kathaṃ samuṭṭhāpesuṃ ,‘‘ āvuso , mahāpanthakattherena idaṃ nāma kataṃ
P4.181 , khīṇāsavānampi maññe kodho uppajjatī ’’ ti .Satthā āgantvā ‘‘ kāya nuttha , bhikkhave , etarahi kathāya sannisinnā ’’ ti pucchitvā ‘‘ imāya nāmā ’’ ti vutte ‘‘ na , bhikkhave , khīṇāsavānaṃ rāgādayo kilesā atthi , mama puttena atthapurekkhāratāya ceva dhammapurekkhāratāya ca katan ’’ ti vatvā imaṃ gāthamāha –
407.
‘‘ Yassa rāgo ca doso ca , māno makkho ca pātito ;
Sāsaporiva āraggā , tamahaṃ brūmi brāhmaṇan ’’ ti .
Tattha āraggāti yassete rāgādayo kilesā , ayañca paraguṇamakkhanalakkhaṇo makkho āraggā sāsapo viya pātito , yathā sāsapo āragge na santiṭṭhati , evaṃ citte na santiṭṭhati , tamahaṃ brāhmaṇaṃ vadāmīti attho .
Desanāvasāne bahū sotāpattiphalādīni pāpuṇiṃsūti .
Mahāpanthakattheravatthu catuvīsatimaṃ .