5. Sambahulabhikkhuvatthu
Na
M2.246 vākkaraṇamattenāti imaṃ dhammadesanaṃ satthā jetavane viharanto sambahule bhikkhū ārabbha kathesi .Ekasmiñhi
V2.224 samaye dahare ceva sāmaṇere ca attano dhammācariyānameva cīvararajanādīni veyyāvaccāni karonte disvā ekacce therā cintayiṃsu –‘‘ mayampi byañjanasamaye kusalā , amhākameva kiñci natthi .
Yaṃnūna
P3.389 mayaṃ satthāraṃ upasaṅkamitvā evaṃ vadeyyāma ,‘ bhante , mayaṃ byañjanasamaye kusalā , aññesaṃ santike dhammaṃ uggaṇhitvāpi imesaṃ santike asodhetvā mā sajjhāyitthāti daharasāmaṇere āṇāpethā ’ ti .Evañhi amhākaṃ lābhasakkāro vaḍḍhissatī ’’ ti .
Te satthāraṃ upasaṅkamitvā tathā vadiṃsu .
Satthā tesaṃ vacanaṃ sutvā ‘‘ imasmiṃ sāsane paveṇivaseneva evaṃ vattuṃ labhati , ime pana lābhasakkāre nissitāti ñatvā ahaṃ tumhe vākkaraṇamattena sādhurūpāti na vadāmi .
Yassa panete issādayo dhammā arahattamaggena samucchinnā , eso eva sādhurūpo ’’ ti vatvā imā gāthā abhāsi –
262.
‘‘ Na vākkaraṇamattena , vaṇṇapokkharatāya vā ;
Sādhurūpo naro hoti , issukī maccharī saṭho .
263.
‘‘ Yassa cetaṃ samucchinnaṃ , mūlaghaccaṃ samūhataṃ ;
Savantadoso medhāvī , sādhurūpoti vuccatī ’’ ti .
Tattha na vākkaraṇamattenāti vacīkaraṇamattena saddalakkhaṇasampannavacanamattena .
Vaṇṇapokkharatāya vāti sarīravaṇṇassa manāpabhāvena vā .
Naroti ettakeneva kāraṇena paralābhādīsu issāmanako pañcavidhena maccherena samannāgato kerāṭikabhāvena
P3.390 saṭho naro sādhurūpo na hoti .Yassa cetan ti yassa ca puggalassetaṃ issādidosajātaṃ arahattamaggañāṇena samūlakaṃ chinnaṃ , mūlaghātaṃ katvā samūhataṃ
M2.247 , so vantadoso dhammojapaññāya samannāgato sādhurūpoti vuccatīti attho .Desanāvasāne bahū sotāpattiphalādīni pāpuṇiṃsūti .
Sambahulabhikkhuvatthu pañcamaṃ .