7. Saṅghabhedaparisakkanavatthu
Sukarānīti
V2.86P3.154 imaṃ dhammadesanaṃ satthā veḷuvane viharanto saṅghabhedaparisakkanaṃ ārabbha kathesi .Ekadivasañhi devadatto saṅghabhedāya parisakkanto āyasmantaṃ ānandaṃ piṇḍāya carantaṃ disvā attano adhippāyaṃ ārocesi .
Taṃ sutvā thero satthu santikaṃ gantvā bhagavantaṃ etadavoca –
‘‘ idhāhaṃ , bhante , pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisiṃ .
Addasā kho maṃ , bhante , devadatto rājagahe piṇḍāya carantaṃ .
Disvā yenāhaṃ tenupasaṅkami , upasaṅkamitvā maṃ etadavoca –
‘ ajjatagge dānāhaṃ , āvuso ānanda , aññatreva bhagavatā aññatra bhikkhusaṅghena uposathaṃ karissāmi saṅghakammañcā ’ ti .
Ajja bhagavā devadatto saṅghaṃ bhindissati , uposathañca karissati saṅghakammāni cā ’’ ti .
Evaṃ vutte satthā –
‘‘ Sukaraṃ sādhunā sādhu , sādhu pāpena dukkaraṃ ;
Pāpaṃ pāpena sukaraṃ , pāpamariyehi dukkaran ’’ ti .( udā .48)–
Imaṃ
M2.99 udānaṃ udānetvā ,‘‘ ānanda , attano ahitakammaṃ nāma sukaraṃ , hitakammameva dukkaran ’’ ti vatvā imaṃ gāthamāha – 163.
‘‘ Sukarāni asādhūni , attano ahitāni ca ;
Yaṃ ve hitañca sādhuñca , taṃ ve paramadukkaran ’’ ti .
Tassattho – yāni kammāni asādhūni sāvajjāni apāyasaṃvattanikattāyeva attano ahitāni ca honti , tāni sukarāni
P3.155 .Yaṃ pana sugatisaṃvattanikattā attano hitañca anavajjatthena sādhuñca sugatisaṃvattanikañceva nibbānasaṃvattanikañca kammaṃ , taṃ pācīnaninnāya gaṅgāya ubbattetvā pacchāmukhakaraṇaṃ viya atidukkaranti .
Desanāvasāne bahū sotāpattiphalādīni pāpuṇiṃsūti .
Saṅghabhedaparisakkanavatthu sattamaṃ .