3. Māravatthu
Yassa pāran ti imaṃ dhammadesanaṃ satthā jetavane viharanto māraṃ ārabbha kathesi .
So
P4.141 kirekasmiṃ divase aññataro puriso viya hutvā satthāraṃ upasaṅkamitvā pucchi –‘‘ bhante
V2.364 , pāraṃ pāranti vuccati , kinnu kho etaṃ pāraṃ nāmā ’’ ti .Satthā ‘‘ māro ayan ’’ ti viditvā ,‘‘ pāpima , kiṃ tava pārena , tañhi vītarāgehi pattabban ’’ ti vatvā imaṃ gāthamāha –
385.
‘‘ Yassa pāraṃ apāraṃ vā , pārāpāraṃ na vijjati ;
Vītaddaraṃ visaṃyuttaṃ , tamahaṃ brūmi brāhmaṇan ’’ ti .
Tattha
M2.395 pāran ti ajjhattikāni cha āyatanāni .Apāran ti bāhirāni cha āyatanāni .
Pārāpāran ti tadubhayaṃ .
Na vijjatīti yassa sabbampetaṃ ‘‘ ahan ’’ ti vā ‘‘ maman ’’ ti vā gahaṇābhāvena natthi , taṃ kilesadarathānaṃ vigamena vītaddaraṃ sabbakilesehi visaṃyuttaṃ ahaṃ brāhmaṇaṃ vadāmīti attho .
Desanāvasāne bahū sotāpattiphalādīni pāpuṇiṃsūti .
Māravatthu tatiyaṃ .