20. Khemābhikkhunīvatthu
Gambhīrapaññan ti imaṃ dhammadesanaṃ satthā gijjhakūṭe viharanto khemaṃ nāma bhikkhuniṃ ārabbha kathesi .
Ekadivasañhi paṭhamayāmasamanantare sakko devarājā parisāya saddhiṃ āgantvā satthu santike sāraṇīyadhammakathaṃ suṇanto nisīdi .
Tasmiṃ khaṇe khemā bhikkhunī ‘‘ satthāraṃ passissāmī ’’ ti āgantvā sakkaṃ disvā
P4.169 ākāse ṭhitāva satthāraṃ vanditvā nivatti .Sakko taṃ disvā ‘‘ ko
M2.412 esā , bhante , āgacchamānā ākāse ṭhitāva satthāraṃ vanditvā nivattī ’’ tiV2.381 pucchi .Satthā ‘‘ esā , mahārāja , mama dhītā khemā nāma mahāpaññā maggāmaggakovidā ’’ ti vatvā imaṃ gāthamāha –
403.
‘‘ Gambhīrapaññaṃ medhāviṃ , maggāmaggassa kovidaṃ ;
Uttamatthamanuppattaṃ , tamahaṃ brūmi brāhmaṇan ’’ ti .
Tattha gabbhīrapaññan ti gambhīresu khandhādīsu pavattāya paññāya samannāgataṃ dhammojapaññāya samannāgataṃ medhāviṃ ‘‘ ayaṃ duggatiyā maggo , ayaṃ sugatiyā maggo , ayaṃ nibbānassa maggo , ayaṃ amaggo ’’ ti evaṃ magge ca amagge ca chekatāya maggāmaggassa kovidaṃ arahattasaṅkhātaṃ uttamatthaṃ anuppattaṃ tamahaṃ brāhmaṇaṃ vadāmīti attho .
Desanāvasāne bahū sotāpattiphalādīni pāpuṇiṃsūti .
Khemābhikkhunivatthu vīsatimaṃ .