9. Sāriputtattheravatthu
Yamhāti
M2.401 imaṃ dhammadesanaṃ satthā jetavane viharanto sāriputtattheraṃ ārabbha kathesi .So kirāyasmā assajittherassa santike dhammaṃ sutvā sotāpattiphalaṃ pattakālato paṭṭhāya ‘‘ yassaṃ disāyaṃ thero vasatī ’’ ti suṇāti , tato añjaliṃ paggayha tatova sīsaṃ katvā nipajjati .
Bhikkhū ‘‘ micchādiṭṭhiko sāriputto , ajjāpi disā namassamāno vicaratī ’’ ti tamatthaṃ tathāgatassa ārocesuṃ .
Satthā theraṃ pakkosāpetvā ‘‘ saccaṃ kira tvaṃ , sāriputta , disā namassanto vicarasī ’’ ti pucchitvā
P4.151 ,‘‘ bhante , mama disā namassanabhāvaṃ vā anamassanabhāvaṃ vāV2.370 tumheva jānāthā ’’ ti vutte ‘‘ na , bhikkhave , sāriputto disā namassati , assajittherassa pana santikā dhammaṃ sutvā sotāpattiphalaṃ pattatāya attano ācariyaṃ namassati .Yañhi ācariyaṃ nissāya bhikkhu dhammaṃ vijānāti , tena so brāhmaṇena aggi viya sakkaccaṃ namassitabboyevā ’’ ti vatvā dhammaṃ desento imaṃ gāthamāha –
392.
‘‘ Yamhā dhammaṃ vijāneyya , sammāsambuddhadesitaṃ ;
Sakkaccaṃ taṃ namasseyya , aggihuttaṃva brāhmaṇo ’’ ti .
Tattha aggihuttaṃvāti yathā brāhmaṇo aggihuttaṃ sammā paricaraṇena ceva añjalikammādīhi ca sakkaccaṃ namassati , evaṃ yamhā ācariyā tathāgatapaveditaṃ dhammaṃ vijāneyya , taṃ sakkaccaṃ namasseyyāti attho .
Desanāvasāne bahū sotāpattiphalādīni pāpuṇiṃsūti .
Sāriputtattheravatthu navamaṃ .