10. Aññataraitthivatthu
Ramaṇīyānīti
P2.201 imaṃ dhammadesanaṃ satthā jetavane viharanto aññataraṃ itthiṃ ārabbha kathesi .Eko kira piṇḍapātiko bhikkhu satthu santike kammaṭṭhānaṃ gahetvā ekaṃ jiṇṇauyyānaṃ pavisitvā samaṇadhammaṃ karoti .
Ekā nagarasobhinī itthī purisena saddhiṃ ‘‘ ahaṃ asukaṭṭhānaṃ nāma gamissāmi , tvaṃ tattha āgaccheyyāsī ’’ ti saṅketaṃ katvā agamāsi .
So puriso nāgacchi .
Sā tassa āgamanamaggaṃ olokentī taṃ adisvā ukkaṇṭhitvā ito cito ca vicaramānā taṃ uyyānaṃ pavisitvā theraṃ pallaṅkaṃ ābhujitvā nisinnaṃ disvā ito cito ca olokayamānā aññaṃ kañci adisvā ‘‘ ayañca puriso eva , imassa cittaṃ pamohessāmī ’’ ti tassa purato ṭhatvā punappunaṃ nivatthasāṭakaṃ mocetvā nivāseti , kese muñcitvā bandhati , pāṇiṃ paharitvā hasati .
Therassa saṃvego uppajjitvā sakalasarīraṃ phari .
So ‘‘ kiṃ nu kho idan ’’ ti cintesi .
Satthāpi ‘‘ mama santike kammaṭṭhānaṃ gahetvā ‘ samaṇadhammaṃ karissāmī ’ ti gatassa bhikkhuno kā nu kho pavattī ’’ ti upadhārento taṃ itthiṃ disvā tassā anācārakiriyaṃ , therassa ca saṃveguppattiṃ ñatvā gandhakuṭiyaṃ nisinnova tena saddhiṃ kathesi
P2.202 –‘‘ bhikkhu , kāmagavesakānaṃ aramaṇaṭṭhānameva vītarāgānaṃ ramaṇaṭṭhānaṃ hotī ’’ ti
M1.404 .Evañca pana vatvā obhāsaṃ pharitvā tassa dhammaṃ desento imaṃ gāthamāha –
99.
‘‘ Ramaṇīyāni araññāni , yattha na ramatī jano ;
Vītarāgā ramissanti , na te kāmagavesino ’’ ti .
Tattha araññānīti supupphitataruvanasaṇḍapaṭimaṇḍitāni vimalasalilasampannāni araññāni nāma ramaṇīyāni .
Yatthāti yesu araññesu vikasitesu padumavanesu gāmamakkhikā viya kāmagavesako jano na ramati .
Vītarāgāti vigatarāgā pana khīṇāsavā nāma bhamaramadhukarā viya padumavanesu
V1.360 tathārūpesu araññesu ramissanti .Kiṃ kāraṇā ?
Na te kāmapavesino , yasmā te kāmagavesino na hontīti attho .
Desanāvasāne so thero yathānisinnova saha paṭisambhidāhi arahattaṃ pāpuṇitvā ākāsenāgantvā thutiṃ karonto tathāgatassa pāde vanditvā agamāsīti .
Aññataraitthivatthu dasamaṃ .
Arahantavaggavaṇṇanā niṭṭhitā .
Sattamo vaggo .