9. Ekavihārittheravatthu
Ekāsanan ti imaṃ dhammadesanaṃ satthā jetavane viharanto ekavihārittheraṃ nāma ārabbha kathesi .
So kira thero ekakova seyyaṃ kappeti , ekakova nisīdati , ekakova caṅkamati , ekakova tiṭṭhatīti catuparisantare pākaṭo ahosi .
Atha naṃ bhikkhū ,‘‘ bhante , evarūpo nāmāyaṃ thero ’’ ti tathāgatassārocesuṃ .
Satthā ‘‘ sādhu sādhū ’’ ti
P3.472 tassa sādhukāraṃ datvā ‘‘ bhikkhunā nāma pavivittena bhavitabban ’’ ti viveke ānisaṃsaṃ kathetvā imaṃ gāthamāha – 305.
‘‘ Ekāsanaṃ ekaseyyaṃ , eko caramatandito ;
Eko damayamattānaṃ , vanante ramito siyā ’’ ti .
Tattha ekāsanaṃ ekaseyyan ti bhikkhusahassamajjhepi mūlakammaṭṭhānaṃ avijahitvā teneva manasikārena nisinnassa āsanaṃ ekāsanaṃ nāma .
Lohapāsādasadisepi ca pāsāde bhikkhusahassamajjhepi paññatte vicitrapaccattharaṇūpadhāne mahārahe sayane satiṃ upaṭṭhapetvā dakkhiṇena passena mūlakammaṭṭhānamanasikārena nipannassa bhikkhuno seyyā ekaseyyā nāma .
Evarūpaṃ ekāsanañca ekaseyyañca bhajethāti attho .
Atanditoti jaṅghabalaṃ nissāya jīvitakappanena akusīto hutvā sabbīriyāpathesu ekakova carantoti attho .
Eko damayan ti rattiṭṭhānādīsu
M2.295 kammaṭṭhānaṃ anuyuñjitvā maggaphalādhigamavasena ekova hutvā attānaṃ damentoti attho .Vanante ramito siyāti evaṃ attānaṃ damento itthipurisasaddādīhi pavivitte vananteyeva abhiramito bhaveyya .
Na hi sakkā ākiṇṇavihārinā evaṃ attānaṃ dametunti attho .
Desanāvasāne
V2.270P3.473 bahū sotāpattiphalādīni pāpuṇiṃsu .Tato paṭṭhāya mahājano ekavihārikameva patthesīti .
Ekavihārittheravatthu navamaṃ .
Pakiṇṇakavaggavaṇṇanā niṭṭhitā .
Ekavīsatimo vaggo .