11. Ujjhānasaññittheravatthu
Paravajjānupassissāti
V2.217M2.239 imaṃ dhammadesanaṃ satthā jetavane viharanto ujjhānasaññiṃ nāma ekaṃ theraṃ ārabbha kathesi .So kira ‘‘ ayaṃ evaṃ nivāseti , evaṃ pārupatī ’’ ti bhikkhūnaṃ antarameva gavesanto vicarati .
Bhikkhū ‘‘ asuko nāma , bhante , thero evaṃ karotī ’’ ti satthu ārocesuṃ .
Satthā ,‘‘ bhikkhave , vattasīse ṭhatvā evaṃ ovadanto ananupavādo .
Yo pana niccaṃ ujjhānasaññitāya paresaṃ antaraṃ pariyesamāno evaṃ vatvā vicarati , tassa jhānādīsu ekopi viseso nuppajjati , kevalaṃ āsavāyeva vaḍḍhantī ’’ ti vatvā imaṃ gāthamāha –
253.
‘‘ Paravajjānupassissa , niccaṃ ujjhānasaññino ;
Āsavā tassa vaḍḍhanti , ārā so āsavakkhayā ’’ ti .
Tattha
P3.377 ujjhānasaññinoti evaṃ nivāsetabbaṃ evaṃ pārupitabbanti paresaṃ antaragavesitāya ujjhānabahulassa puggalassa jhānādīsu ekadhammopi na vaḍḍhati , atha kho āsavāva tassa vaḍḍhanti .Teneva kāraṇena so arahattamaggasaṅkhātā āsavakkhayā ārā dūraṃ gatova hotīti .
Desanāvasāne bahū sotāpattiphalādīni pāpuṇiṃsūti .
Ujjhānasaññittheravatthu ekādasamaṃ .