Dhammapada-aṭṭhakathā
( Paṭhamo bhāgo )
Ganthārambhakathā
1.
Mahāmohatamonaddhe
V1.1M1.1P1.1 , loke lokantadassinā ;Yena saddhammapajjoto , jālito jalitiddhinā .
2.
Tassa pāde namassitvā , sambuddhassa sirīmato ;
Saddhammañcassa pūjetvā , katvā saṅghassa cañjaliṃ .
3.
Taṃ taṃ kāraṇamāgamma , dhammādhammesu kovido ;
Sampattasaddhammapado , satthā dhammapadaṃ subhaṃ .
4.
Desesi
V1.2 karuṇāvega-samussāhitamānaso ;Yaṃ ve devamanussānaṃ , pītipāmojjavaḍḍhanaṃ .
5.
Paramparābhatā tassa , nipuṇā atthavaṇṇanā ;
Yā tambapaṇṇidīpamhi , dīpabhāsāya saṇṭhitā .
6.
Na sādhayati sesānaṃ , sattānaṃ hitasampadaṃ ;
Appeva nāma sādheyya , sabbalokassa sā hitaṃ .
7.
Iti āsīsamānena , dantena samacārinā ;
Kumārakassapenā haṃ , therena thiracetasā .
8.
Saddhammaṭṭhitikāmena
P1.2 , sakkaccaṃ abhiyācito ;Taṃ bhāsaṃ ativitthāra-gatañca vacanakkamaṃ .
9.
Pahāyāropayitvāna
M1.2 , tantibhāsaṃ manoramaṃ ;Gāthānaṃ byañjanapadaṃ , yaṃ tattha na vibhāvitaṃ .
10.
Kevalaṃ taṃ vibhāvetvā , sesaṃ tameva atthato ;
Bhāsantarena bhāsissaṃ , āvahanto vibhāvinaṃ ;
Manaso pītipāmojjaṃ , atthadhammūpanissitanti .